Azərbaycan Qırğızıstana yanğınsöndürmə üçün xüsusi texnika hədiyyə edib
Azərbaycan Respublikasının Prezidenti cənab İlham Əliyevin tapşırığına əsasən, AR Fövqəladə Hallar Nazirliyi tərəfindən Qırğız Respublikasına maddi-texniki yardım göndərilib. Azərbaycanın Fövqəladə Hallar Nazirliyi Qırğızıstanın Fövqəladə Hallar Nazirliyinə 10 ədəd müasir “KamAZ” markalı yanğınsöndürmə maşını təhvil verib.
Humanitar yardım Bakı Beynəlxalq Dəniz Ticarət Limanından yola salınıb və artıq Qırğızıstana çatdırılıb. Yanğınsöndürmə maşınları fövqəladə hallara operativ reaksiya vermək üçün lazım olan bütün avadanlıqlarla təchiz olunub və Qırğızıstanın Fövqəladə Hallar Nazirliyinin maddi-texniki bazasını gücləndirəcək.
Bu maşınlar yüksək keçid qabiliyyətinə və böyük su tutumuna malikdir, eyni zamanda altı xilasedicinin daşınması üçün nəzərdə tutulub. Bu xüsusiyyətlər onları çətin keçilən və yol olmayan ucqar ərazilərdə yanğınların söndürülməsi üçün faydalı edir.
