Bişkek şəhərində yerləşən Milli Kitabxanada Azərbaycan ədəbiyyatı guşəsinin açılış mərasimi keçirilib
Azərbaycan Respublikasının Qırğız Respublikasındakı Mədəniyyət Günləri çərçivəsində Alıkul Osmonov adına Milli Kitabxanada Azərbaycan ədəbiyyatı guşəsinin təntənəli açılışı keçirilib. Bu hadisə iki qardaş xalq arasında uzunillik dostluğun möhkəmlənməsinin və ortaq tarixi, mənəvi dəyərlərə əsaslanan mədəni əlaqələrin inkişafının rəmzi kimi qiymətləndirilir.
Açılış mərasimi zamanı görkəmli şair, dramaturq və ictimai xadim Bəxtiyar Vahabzadənin yaradıcılığına həsr olunmuş ədəbi-bədii axşam təşkil olunub.
Tədbirdə Qırğız Respublikasının mədəniyyət, informasiya və gənclər siyasəti nazirinin müavini Gülbara Abdıkalıqova, Azərbaycan Respublikasının mədəniyyət naziri Adil Kərimli, diplomatik korpusun nümayəndələri, mədəniyyət xadimləri, ədəbiyyatşünaslar iştirak ediblər.
