Qırğızıstanda Azərbaycan Respublikasının Səfirliyi Novruz və Ramazan bayramlarına həsr olunmuş təntənəli qəbul təşkil edib.
Qırğızıstanda Azərbaycan Respublikasının Səfirliyi Novruz və Ramazan bayramlarına həsr olunmuş parlaq və təntənəli qəbul təşkil edib.
Bu bayram axşamında Bişkekdə akkreditə olunmuş diplomatik korpusun nümayəndələri, Qırğızıstanın dövlət və ictimai xadimləri, elm və mədəniyyət nümayəndələri, beynəlxalq təşkilatların təmsilçiləri, eləcə də Azərbaycan diasporunun üzvləri bir araya gəliblər.
Tədbirdə çıxış edən Azərbaycanın Qırğızıstandakı fövqəladə və səlahiyyətli səfiri Lətif Qəndilov qonaqları səmimi qəlbdən bayramlar münasibətilə təbrik edib, onlara möhkəm cansağlığı, xoşbəxtlik, firavanlıq, bolluq, bütün işlərində uğurlar, həmçinin xalqlar arasında və hər bir ailədə sülh, dostluq, həmrəylik və qarşılıqlı anlaşma arzulayıb.
Gecənin xüsusi ovqatını Orucluq bayramı və Novruzun əhəmiyyəti ilə bağlı səsləndirilən fikirlər daha da gücləndirib. Bu bayramların əsrlər boyu insanları birləşdirdiyi, dostluğu və qarşılıqlı hörməti möhkəmləndirdiyi vurğulanıb. Bu məqamı Qırğızıstanın xarici işlər nazirinin müavini Meder Abakirov da öz çıxışında qeyd edib.
“Münasibətlərimiz qardaş Azərbaycan xalqı ilə ortaq tarixi və mədəni dəyərlərə — qarşılıqlı hörmət və dəstəyə əsaslanır. Biz ikitərəfli əməkdaşlığın dinamik inkişafını yüksək qiymətləndirir və strateji tərəfdaşlığımızın daha da möhkəmləndirilməsinə böyük önəm veririk. Əminəm ki, fəal siyasi dialoq və müxtəlif sahələrdə əməkdaşlıq əlaqələrimizin daha da güclənməsinə xidmət edəcək”, — deyə o bildirib.
Qəbul həqiqətən də səmimi, isti və demək olar ki, ailəvi bir mühitdə keçib, qonaqlara xoş ovqat və unudulmaz təəssüratlar bəxş edib.
Gecənin xoş sürprizlərindən biri də məşhur Kəlbəcər termal su yatağından əldə olunan “İstisu” mineral suyu olub. Səfirin sözlərinə görə, bu unikal su artıq Qırğızıstana da çatdırılmağa başlanıb. O bildirib ki, 30 illik işğaldan sonra Azərbaycanın azad edilmiş ərazilərində — Kəlbəcər rayonunda “İstisu”nun istehsalı yenidən bərpa olunub.
Təbiətin dərinliklərindən qaynaqlanan bu su öz müalicəvi xüsusiyyətləri və zəngin mineral tərkibi ilə seçilir. Məhz buna görə “İstisu” təkcə Azərbaycanda deyil, onun hüdudlarından kənarda da geniş tanınıb. Bu axşam qonaqlar onun yüksək keyfiyyətini və özünəməxsus dadını xüsusi zövqlə dəyərləndiriblər.
