Səfirlik tərəfindən Novruz bayramına həsr edilmiş tədbir keçirilmişdir
17 mart tarixində Səfirlik tərəfindən Bişkek şəhərinin “Hyatt Regency” mehmanxanasında Novruz bayramına həsr edilmiş tədbir keçirilmişdir.
Bayram tədbirində, Qırğız Respublikasının rəsmiləri, Dipolomatik korpusun nümayəndələri və Azərbaycan diaspor nümayəndələri, Bişkekdə təhsil alan azərbaycanlı tələbələr, yerli ictimaiyyətin nümayəndələri və KİV nümayəndələri iştirak etmişlər.
Tədbirdə giriş sözü ilə çıxış edən səfir Lətif Qəndilov Novruz bayramının Azərbaycanın, türk dünyasının, o cümlədən bir çox şərq xalqlarının qədim və önəmli bayramlarından biri olduğunu vurğulamış, Novruz bayramı və onun Azərbaycandakı ənənələri və xüsusiyyətləri barədə məlumat vermişdir. Səfir Azərbaycan-Qırğızıstan ikitərəfli münasibətlərinin bütün sahələrində olduğu kimi mədəni sahədə də yüksək səviyyədə olduğunu bildirərək, 2024-cü ilin aprel ayında Azərbaycanda Qırğızıstan Mədəniyyət Günlərinin yüksək səviyyədə uğurla keçirildiyini, 2025-ci ilin aprel ayının 20-25-də Bişkekdə Azərbaycan Mədəniyyəti Günlərinin keçiriləcəyini və bu kimi mədəni tədbirlərin xalqlarımız arasında münasibətlərin inkişafına böyük töhfə verdiyini bildirmişdir.
Qırğız Respublikasının Xarici İşlər Nazirliyinin Beynəlxalq Təşkilatlar Departamentinin direktoru Melis Mamadalyev çıxış edərək Qırğızıstan ilə Azərbaycan arasında münasibətlərin yüksək səviyyədə olduğunu bildirdi və Azərbaycan xalqını Novruz bayramı münasibətilə təbrik etdi.
Bayram tədbiri boyunca Azərbaycan milli rəqsləri nümayiş etdirilmiş, Novruz bayramı il bağlı musiqili videoçarxlar göstərilmiş, qonaqlara Azərbaycan mətbəxinin ləziz yeməkləri edilmişdir.
